رأي مواطن حول المياه في زمن الحرب، رفع كلفة المياه. المهندس نبيل شحادة الشلالدة
في زمن الحرب الشاملة على شعبنا، تقتيل واجتياحات يومية وحصار وأزمة رواتب وبطالة العمّال وانهيار الحالة الاقتصادية، الحكومة الفلسطينية تقوم برفع المحروقات، وقبل أيام فقط قامت بإصدار قرار سيؤدي إلى رفع كلفة المياه على المواطن بشكل كبير، مثلاً، كانت فاتورة المياه في مصلحة مياه محافظة القدس من صفر متر حتى 10 متر تبلغ 62 شيكل مبلغ ثابت (كحد أدنى)، وإذا بزيد عن 10 متر، يلغى مبلغ 62 شيكل، وتتم محاسبتك على أساس سعر كوب المياه الرسمي.
اليوم تم خفض مبلغ 62 شيكل وصار 42 شيكل .. لكن وين الفخ؟ كل متر مياه بتستهلكه رح تدفع حقه 5.5 شيكل حتى 20 متر .. وأي متر فوق 20 بصير سعره 7.2 شيكل، "يضاف فوقهم 42 شيكل".
مثال: انت استهلكت 10 متر.. كان سعرهم سابقا 62 شيكل ضمن نطاق حد الفاتورة الأدنى.
اليوم: قبل كل شيء عندك مبلغ ثابت يساوي 42 شيكل (فرض من فروض الحكومة) + سعر 10 متر .. بتطلع قيمتهم: 42 + 55 = 97 شيكل... يعني زيادة بـ 35 شيكل فرقية فاتورتك إذا استهلكت فقط 10 متر
غير كل ما سبق، تم رفع سعر متر المياه من 4.5 شيكل سابقا إلى 5.5 شيكل حاليا، وأي متر بعد استهلاكك 20 متر بصير سعره 7.2 شيكل.
حتى أبسطها عليكم أكثر .. شوفوا متوسط فواتيركم السابقة إذا كان مثلا متوسط الاستهلاك 15 متر بدك تضربهم في 5.5 شيكل، وتضيف عليهم 42 شيكل.
هل يعقل ذلك يا حكومتنا الرشيدة غير المنتخبة والتي لا تخضع لرقابة برلمانية؟ معقول هذا دور الحكومات في زمن الحرب؟ هل هذه هي سياسات تعزيز صمود المواطن؟ طبعا كل ذلك يستحقه الناس لانهم قبلوا أن يتم حكمهم بدون انتخابات او برلمان، إلى متى؟؟